एक साक्षात धगधगती अग्निरेखा - चापेकरांच्या फाशीतून फुललेली, पेटलेली; त्यांचे अपुरे कार्य चालवण्याच्या शपथेने तेजाळलेली; हौतात्म्याचा अनावर ध्यास जोपासणारी. या ध्यासातूनच सावरकरांना ’स्वातंत्र्यलक्ष्मी की जय’ हा महान्मंगल मंत्र स्फुरला. या मंत्राच्या सिध्दीसाठी त्यांनी ’अभिनव भारत’ या क्रांति-संघटनेची संस्थापना केली. सावरकर लंडनला गेले, तेही त्यासाठीच. तेथून त्यांना अंदमानच्या उदासवाण्या एकलकोंडीत अंधारबध्द व्हावे लागले - अर्धशतकाची शिक्षा सोबतीला घेऊन. तरीही या अग्निरेखेची धग किंचितही ओसरली नाही. अदम्य आत्मबलाच्या आधारावर ती धगधगतच राहिली. सावरकरांच्या दिव्यदाहक क्रांतिव्रताची ही भव्योत्कट चरितकहाणी.